नयाँ वर्षदेखि शेयर बजारमा नयाँ युग: वैशाख २ गतेबाट ब्रोकरमार्फत मार्जिन कारोबार सुरु हुने
स्टक ब्रोकरहरूले शेयर बजारका लगानीकर्तालाई आउँदो नयाँ वर्ष २०८३ को सुरुवातसँगै ठुलो सुविधा दिने भएका छन्। स्टक ब्रोकर्स एसोसिएसन अफ नेपालले एक विज्ञप्ति जारी गर्दै आगामी वैशाख २ गतेदेखि योग्य ब्रोकरहरूमार्फत मार्जिन कारोबार (ऋण लिएर शेयर किन्ने) सुविधा उपलब्ध गराउने घोषणा गरेको हो।
मार्जिन कारोबारको तयारी अन्तिम चरणमा
एसोसिएसनको हालै बसेको कार्यसमिति बैठकले मार्जिन कारोबार सुविधासम्बन्धी ब्रोकरहरूको आन्तरिक 'कार्यप्रक्रिया' पारित गरिसकेको छ।
- यसअघि नेपाल धितोपत्र बोर्ड (SEBON) ले ‘मार्जिन कारोेबार सुविधासम्बन्धी निर्देशिका, २०८२’ लागू गरेको थियो।
- त्यसलगत्तै नेपाल स्टक एक्सचेन्ज (NEPSE) ले पनि ‘मार्जिन कारोबार सुविधासम्बन्धी कार्यप्रक्रिया, २०८२’ जारी गरेर यसको बाटो खुला गरेको थियो। नियामक र सञ्चालक दुवै निकायबाट खाका तयार भएपछि ब्रोकरहरूले पनि आफ्नो सञ्चालन प्रक्रिया टुंगो लगाएका हुन्।
कारोबार वैशाख २ गते नै किन?
नीतिगत र प्रक्रियागत कामहरू सम्पन्न भइसके पनि सफ्टवेयर र प्रणालीमा केही प्राविधिक विषयहरू मिलाउन बाँकी छ। ती प्राविधिक पक्षहरूलाई पूर्ण रूपमा व्यवस्थित गरी नयाँ वर्षको अवसर पारेर वैशाख २ गतेबाट मात्रै यो सुविधा सर्वसाधारण लगानीकर्ताका लागि सुचारु गर्ने तयारी गरिएको एसोसिएसनले जनाएको छ।
लगानीकर्तालाई फाइदा: यो सुविधा लागू भएपछि लगानीकर्ताले आफूसँग भएको रकमको निश्चित प्रतिशत मात्र बुझाएर ब्रोकरमार्फत नै ऋण लिएर शेयर किन्न सक्नेछन्। यसले बजारमा पूँजी प्रवाह (Liquidity) बढाउन मद्दत गर्नेछ।
