काठमाडौं — साताको तेस्रो कारोबार दिन मङ्गलबार नेपाल स्टक एक्सचेन्ज (नेप्से) परिसूचकमा झिनो सुधार देखिएको छ। दिनभरजसो तीव्र उतारचढावबाट गुजि्रएको सेयर बजार अन्तिम समयमा ९.२४ अंक (अर्थात् ०.३६%) को वृद्धि ल्याउँदै २,५२२.६६ को विन्दुमा पुगेर बन्द भएको छ।
कारोबारको सुरुआती समयमा २४९० को मनोवैज्ञानिक विन्दुसम्म ओर्लिएको बजारले ११:३० बजेपछि भने गति समातेको थियो। खरिदकर्ताको सक्रियता बढ्दा मध्याह्नतिर नेप्से परिसूचक २५४० को विन्दु नजिक पुगेको थियो। तर, उपल्लो विन्दुमा पुगेपछि अल्पकालीन लगानीकर्ताले मुनाफा सुरक्षित (Profit Booking) गर्ने होडबाजी चलाउँदा दोस्रो प्रहरमा बजारले गति गुमाउन पुग्यो।
बजारमा केही समययता कायम रहेको अन्योल र पर्ख र हेरको अवस्थाका बिच पनि मङ्गलबार समग्र बजार चौतर्फी दबाबमा भने परेन। कुल ३४१ कम्पनीका ७६ लाख १३ हजार ६८१ कित्ता सेयर ४८ हजार ३४१ पटकको कारोबारमार्फत २ अर्ब ९० करोड ६९ लाख रुपैयाँ बराबरमा खरिद-बिक्री भए।
आजको कारोबारमा बजारको फराकिलो दायरा (Market Breadth) भने सकारात्मक देखिएको छ। घटेका कम्पनीको तुलनामा बढ्ने कम्पनीको सङ्ख्या दोब्बरभन्दा बढी रह्यो। कुल १८१ कम्पनीका सेयरधनीले आज नाफा कमाएका छन् भने ८४ कम्पनीको सेयर मूल्यमा गिरावट आएको छ। १२ वटा कम्पनीको मूल्य भने अपरिवर्तित रह्यो।
लाभांशको सिजन नजिकिँदै गर्दा जलविद्युत् र लघुवित्त समूहका केही कम्पनीहरूमा लगानीकर्ताको आकर्षण राम्रो देखिएको छ। जसका कारण आज MMKJL को सेयर मूल्य सर्वाधिक ७.१५ प्रतिशतले बढेर ३४६ रुपैयाँ पुगेको छ। यसैगरी माछापुच्छ्रे बैंक डिबेन्चर, इमर्जिङ नेपाल लिमिटेड, सान्जेन जलविद्युत् र मेन्छियाम हाइड्रोपावरका सेयरधनीहरू पनि आजका प्रमुख कमाउने सूचीमा पर्न सफल भए।
कारोबार रकमका आधारमा आज होटल तथा पर्यटन र सिमेन्ट क्षेत्रका कम्पनीहरू अगाडि देखिएका छन्। SOHL१३ करोड ८२ लाख रुपैयाँभन्दा बढीको कारोबारसहित शीर्ष स्थानमा रह्यो भने शिवम् सिमेन्ट (SHIVM) १३ करोड ६३ लाख रुपैयाँको सेयर खरिद-बिक्रीसहित दोस्रो स्थानमा रह्यो। यसका अलावा आँखु खोला जलविद्युत्, रिडी पावर र तमोर भ्याली हाइड्रोपावरमा पनि उल्लेख्य रकमको कारोबार भएको छ।
आजको कारोबारपछि नेप्सेको कुल बजार पूँजीकरण ४३ खर्ब ३९ अर्ब रुपैयाँ कायम भएको छ। बजारमा ठूला लगानीकर्ताहरू अझै ठूलो खरिदका लागि स्पष्ट नीतिगत मार्गदर्शन र मौद्रिक सहजताको पर्खाइमा रहेका कारण कारोबार रकम ३ अर्बभन्दा तलै खुम्चिएको विश्लेषण गरिएको छ। यद्यपि, २५०० को टेवा (Support) विन्दुलाई बजारले कायम राख्नुलाई प्राविधिक दृष्टिकोणबाट सकारात्मक संकेतका रूपमा हेरिएको छ।
