इन्डिगो एयरलाइन्स संकटमा : कम्पनीको शेयरमा ठूलो गिरावट

नेपाली शेयर न्यूज । भारतीय एयरलाइन कम्पनी इन्डिगो एयरलाइन्सको शेयर बजारमा भारी गिरावट आएको छ । एयरलाइनको उडानमा जारी संकटका बीच कम्पनीको सेयर निरन्तर ओरालो लागेको हो । सोमबारको कारोबार सत्रमा इन्डिगोको सेयर ९ प्रतिशतले घटेको छ ।

पछिल्लो एक सातामा कम्पनीको सेयरमा निरन्तर दबाब परेको छ र यस अवधिमा कुल १५ प्रतिशत गिरावट आएको छ। त्यस्तै, सोमबारको कारोबार सत्रमा स्पाइसजेटको सेयर भने १० प्रतिशतसम्म बढेको थियो। इन्डिगोको संकट गत साताको बुधबारदेखि सुरु भएको थियो, जब कम्पनीका सयौं उडान रद्द भए र दर्जनौं उडान ढिलाइ भए। शुक्रबार मात्र कम्पनीका एक हजारभन्दा बढी उडान रद्द भएका थिए। उडान रद्द र ढिलाइका कारण अन्य एयरलाइन्सको भाडा पनि अकासिएको छ।

यसैबीच एयरलाइनले आफ्नो फ्लाइट नेटवर्क १० डिसेम्बरसम्म स्थिर हुने जानकारी दिएको छ। कम्पनीले समयमै उडान पूरा गर्ने दर सुधार र रद्द हुने उडान घटाउने योजना पनि सार्वजनिक गरेको छ। शेयरको यो गिरावटले लगानीकर्तालाई ठूलो क्षति पुर्‍याएको छ। प्रारम्भिक दुई घण्टामै कम्पनीको बजार पूँजी लगभग १५ हजार करोड रुपैयाँले घटेर १,९२,११६.२० करोड रुपैयाँमा झरेको छ। गत हप्तामा पनि कम्पनीको बजार पूँजीमा करिब १६ हजार करोड रुपैयाँको गिरावट आएको थियो। यसरी हेर्दा, १ डिसेम्बरदेखि हालसम्म मार्केट क्यापमा ३० हजार करोड रुपैयाँभन्दा बढीको गिरावट आएको छ।