नेपाली शेयर न्यूज/ शेयर बजारमा बुधबार सामान्य गिरावट आएर बन्द भएको छ । नेप्से परिसूचक ७.८६ अंकले घटेर २६०६.२० को स्तरमा पुगेको छ । हाल बजार २५८०–२६०० को डिमाण्ड जोनमा आइ सपोर्ट पाएको देखिन्छ, जसले तीव्र गिरावटलाई रोक्ने काम गरेको छ ।
बुधबार ३ अर्ब ७३ करोड रुपैयाँ बराबरको शेयर कारोबार भएको छ । ७९ कम्पनीको मूल्य बढ्दा, १६९ कम्पनीको मूल्य घटेको छ भने ९ कम्पनीको मूल्य स्थिर रहेको छ । सबै सेक्टरका सूचक झरेका छन् । तर गिरावट दर सामान्यतया १ प्रतिशतभन्दा कम छ ।
बैंकिङ ०.०५%, विकास बैंक ०.२९%, फाइनान्स ०.५७%, होटल तथा पर्यटन ०.१३%, हाइड्रोपावर ०.६६%, लगानी ०.३२%, जीवन बीमा ०.२१%, उत्पादन तथा प्रशोधन ०.४२%, माइक्रोफाइनान्स ०.२९%, निर्जीवन बीमा ०.३५%, अन्य ०.३९% र व्यापार ०.०२% ले घटेको छ ।
प्राविधिक विश्लेषण
नेपाली शेयर बजार हाल २५८०–२६०० को डिमाण्ड जोनमा आइ सपोर्ट पाएको देखिन्छ । बजार लगातार घट्दै आएको अवस्थामा अहिले थोरै स्थिरता देखिएको छ । सोमबार बजार ३ अंकले घटेको थियो भने मंगलबार ७ अंकले बढेको र बुधबार ५ अंकले घटेको छ ।
बजारले पहिले ठूलो रेड क्यान्डल बनाएर तीव्र गिरावट देखाइरहेको थियो, तर हालको डिमाण्ड जोनमा आएपछि घट्ने गति कम भएको छ । डेली चार्टमा हाइयर हाइ र हाइयर लो कायम देखिन्छ, जसले बजारले डिमाण्ड जोनबाट फर्किन सक्ने सम्भावना रहेको संकेत दिएको छ । बजारको स्थायित्व पुष्टि गर्न एक घण्टाको चार्टमा मुभिङ एभरेज च्यानलको ब्रेक आउट देखिनु आवश्यक हुन्छ ।
यदि ब्रेक आउट भयो भने बजारले डिमाण्ड जोनबाट समर्थन पाउँदै फर्केको मान्न सकिन्छ । यो स्तरलाई भविष्यमा बजारको सम्भावित वृद्धि वा घट्ने दिशाको महत्वपूर्ण संकेत मानिएको छ ।
