Nepali Share News l
ताप्लेजुङमा आयोजनास्थल रहेको स्नो रिभर्स लिमिटेडले आज (सोमबार, ९ चैत) देखि आफ्नो प्राथमिक सेयर (IPO) निष्काशन सुरु गरेको छ। कम्पनीले पहिलो चरणमा आयोजना प्रभावित स्थानीय बासिन्दा र वैदेशिक रोजगारीमा रहेका नेपालीहरूका लागि सेयर बिक्री खुला गरेको हो।
नेपाल धितोपत्र बोर्डबाट माघ १८ गते अनुमति पाएको यस कम्पनीले प्रतिकित्ता १०० रुपैयाँका दरले कुल १८ लाख ७५ हजार कित्ता सेयर सर्वसाधारणमा जारी गर्ने तयारी गरेको छ। जसमध्ये पहिलो चरणमा १० लाख ३१ हजार २५० कित्ता सेयर बाँडफाँट गरिँदैछ।
को-कोले भर्न पाउँछन् आवेदन?
१. आयोजना प्रभावित स्थानीय (९,३७,५०० कित्ता):
- अति प्रभावित क्षेत्र: ताप्लेजुङको सिरिजङ्गा गाउँपालिका-८ का स्थानीयका लागि ४ लाख ६८ हजार ७५० कित्ता।
- प्रभावित क्षेत्र: सिरिजङ्गा गाउँपालिका (वडा १-७), सिदिङ्वा गाउँपालिका (वडा ५ र ६), पाथीभरा याङवारक गाउँपालिका (वडा ५ र ६), र पाँचथरको हिलिहाङ गाउँपालिका-१ का स्थानीयका लागि ४ लाख ६८ हजार ७५० कित्ता।
२. वैदेशिक रोजगारीमा रहेका नेपाली (९३,७५० कित्ता):
- नेपाल सरकारको सम्बन्धित निकायबाट श्रम स्वीकृति लिई विदेशमा कार्यरत नेपालीहरूले यस कोटामा आवेदन दिन सक्नेछन्।
आवेदनको समय र सीमा
- वैदेशिक रोजगारीमा रहेकाहरूका लागि: छिटोमा चैत १२ गते र ढिलोमा चैत २३ गतेसम्म।
- स्थानीय बासिन्दाका लागि: छिटोमा चैत २३ गते र ढिलोमा वैशाख ८ गतेसम्म।
- कित्ता संख्या: स्थानीयले न्यूनतम १० देखि अधिकतम १०,००० कित्तासम्म र वैदेशिक रोजगारीमा रहेकाले न्यूनतम १० देखि १,००० कित्तासम्म आवेदन दिन सक्नेछन्।
कहाँबाट दिने आवेदन?
स्थानीय बासिन्दाहरूले सानिमा क्यापिटल (नक्साल), आयोजना स्थल (याम्फुदिन), तथा नेपाल बैंक, एनएमबि, सानिमा र ग्लोबल आइएमई बैंकका तोकिएका शाखाबाट फाराम बुझाउन सक्नेछन्। वैदेशिक रोजगारीमा रहेकाहरूले भने सी-आस्बा (C-ASBA) प्रणालीमार्फत संसारको जुनसुकै कुनाबाट अनलाइन आवेदन दिन सक्नेछन्।
यस निष्काशनको बिक्री प्रबन्धकमा सानिमा क्यापिटल लिमिटेड रहेको छ।
