राधी विद्युतको साधारण सभा स्थगित

Nepali Share News l

राधी विद्युत कम्पनी लिमिटेडले पुस २२ गतेका लागि तय गरेको वार्षिक साधारण सभा स्थगित गरेको छ। सभा सञ्चालनका लागि आवश्यक न्यूनतम शेयरधनीहरूको उपस्थिति (गणपूरक संख्या) नपुगेपछि कम्पनीले बैठक स्थगित गर्ने निर्णय लिएको हो।

मंसिर २९ गतेको सञ्चालक समिति बैठकले तय गरेबमोजिम, यो सभा ललितपुरको चापागाउँमा बिहान ८ बजेदेखि सुरु हुने कार्यक्रम थियो। सभामा मुख्य गरी गत आर्थिक वर्ष २०८१/८२ को नाफा-नोक्सान, वासलात र नगद प्रवाह विवरणमाथि छलफल गरी पारित गर्ने योजना बनाइएको थियो।

यसका साथै, कम्पनीको प्रबन्धपत्र र नियमावलीमा संशोधन गर्ने विशेष प्रस्ताव र नयाँ आर्थिक वर्षका लागि लेखापरीक्षक नियुक्त गर्ने विषयमा पनि छलफल हुने कार्यसूची थियो। तर, शेयरधनीहरूको सहभागिता कम भएका कारण यी कुनै पनि प्रस्तावमाथि निर्णय हुन सकेन।

अब कम्पनीले अर्को सूचना जारी गरी सभाको नयाँ मिति र समय तय गर्नेछ।