काठमाडौं । सांग्रिला डेभलपमेन्ट बैंक लिमिटेडले मंसिर १२ गते बसेको सञ्चालक समितिको बैठकपछि वार्षिक साधारणसभा आह्वान गरेको छ। बैंकले आगामी पुस ७ गते, काठमाडौंको कालिकास्थानस्थित अमृतभोग क्याटरर्समा बिहान १०:३० बजे २१औं साधारणसभा गर्ने निर्णय गरेको छ। बैठकले हाल कायम चुक्ता पूँजीबाट ५ प्रतिशत बोनस शेयर तथा ५.३५८३ प्रतिशत नगद लाभांश वितरण गर्ने प्रस्ताव साधारणसभामा पेस गर्ने भएको छ।
साधारणसभामा बैंक तथा वित्तीय संस्थासँग आवश्यक भए मर्जर प्रक्रिया अगाडि बढाउन सञ्चालक समितिलाई अख्तियारी दिने, प्रबन्धपत्र तथा नियमावलीमा आवश्यक संशोधन गर्ने तथा सञ्चालकको भत्ता वृद्धि गर्ने प्रस्तावहरू पनि रहनेछन्। गत आर्थिक वर्षको वार्षिक प्रतिवेदन, लेखापरीक्षकको प्रतिवेदन, वासलात, नाफा–नोक्सान हिसाब र नगद प्रवाह विवरण पारित गर्ने तथा चालू आवका लागि नयाँ लेखापरीक्षक नियुक्ति गरी पारिश्रमिक निर्धारण गर्ने प्रस्ताव पनि सभामा प्रस्तुत गरिनेछ। साधारणसभा र लाभांश वितरण प्रयोजनका लागि बैंकले मंसिर २३ गतेदेखि पुस ७ गतेसम्म बुक क्लोज गर्ने निर्णय गरेको छ।
