बैंक व्यवसाय हो, नयाँ उद्यमी खोज्नुस् : गभर्नर पौडेल

काठमाडौं । नेपाल राष्ट्र बैंकका गभर्नर डा. विश्वनाथ पौडेलले बैंक तथा वित्तीय संस्थाका प्रमुख कार्यकारी अधिकृत (सीईओ)हरुलाई व्यवसायमा लगानी गर्न नहिच्किचाउन आग्रह गरेका छन्।

बैंक तथा वित्तीय संस्था परिसंघ नेपाल (सिबिफिन)को वार्षिक साधारणसभामा सम्बोधन गर्दै गभर्नर पौडेलले भने, 'बैंक भनेको व्यवसाय हो। बिजनेसमा लगानी गर्नुस्, नयाँ उद्यमी खोज्नुस्। आर्थिक समृद्धिका लागि लगानी आवश्यक छ, यसले राष्ट्रिय अर्थतन्त्रलाई बल दिन्छ।'

उनले थपे, 'देशको ग्रोथ नभई तपाईंहरुको ग्रोथ हुँदैन। आईटी लगायत नयाँ क्षेत्रमा लगानी गर्न मन छ भने भन्नुस्, हामी आवश्यक सहयोग गर्नेछौं।' गभर्नरले राष्ट्र बैंकलाई पनि सबै कुरा थाहा नहुने हुँदा नीतिगत सुधार र सुझावहरू स्पष्ट राख्न सीईओहरुलाई आग्रह गरेका छन्। पौडेलले भने,'नीतिगत कुराहरु छन् भने हामीसँग साझा गर्नुस्, सँगै काम गर्छौँ। राष्ट्र बैंकले तपाईंलाई लगानीमा सघाउँछ।'