मौद्रिक नीतिको समीक्षाः शेयर बजारले के–कस्तो पाउँला राहत ?

नेपाली शेयर न्यूज/ नेपाल राष्ट्र बैंकले चालु आर्थिक वर्षको मौद्रिक नीतिको पहिलो त्रैमासिक समीक्षा सोमबार सार्वजनिक गर्ने तयारी गरेको छ । ४५ दिनभित्र समीक्षा गर्ने प्रावधानअनुसार संचालक समितिको बैठक सोमबार बिहान बोलाइएको छ । समीक्षा पारित भएपछि साँझतिर सार्वजनिक गर्ने तयारी गरिएको छ ।

यसपटकको मौद्रिक नीतिको समीक्षा व्यवसायी तथा लगानीकर्ताले निकै आशाका साथ हेरिरहेका छन्। जेन–जेनरेशन आन्दोलनपछि थुप्रै व्यवसाय प्रभावित भएका कारण व्यवसायहरूको मनोबल बढाउने किसिमको राहत आउने अपेक्षा गरिएको छ । बैंक तथा वित्तीय संस्थामा लगानीयोग्य पुँजी वृद्धि भएसँगै कर्जा विस्तार कसरी बढाइने भन्नेमा राष्ट्र बैंक विशेष ध्यान दिन लागेको छ । अटो क्षेत्रजस्ता चलायमान उद्योगहरू पनि अहिले मन्दीमा भएकाले तिनलाई पुनः गति दिन नीतिगत प्रोत्साहन आउने संकेत छ ।

राष्ट्र बैंक स्रोतका अनुसार यसपटकको समीक्षाले शेयर बजारमा ठूलो परिवर्तन ल्याउने जस्तै कुनै कडा वा ठूला नीति ल्याउने सम्भावना कम छ । अर्थमन्त्री रामेश्वर खनालले पुँजीबजार सुधारका लागि बनाएको समितिको सुझावअनुसार अघिल्लो नीतिमा आवश्यक परिवर्तन भइसकेकाले यो समीक्षामा खासै नयाँ निर्णय नआउने बताइएको छ ।

यद्यपि, लगानीकर्ताहरूले लामो समयदेखि बैंकमार्फत लिने मार्जिन कर्जामा खुकुलो व्यवस्था गर्नुपर्ने माग गर्दै आएका छन् । विशेषगरी कोर क्यापिटलको ४० प्रतिशतभित्र मात्र मार्जिन कर्जा दिने सीमा हटाउनुपर्ने कुरा लगानीकर्ताको मुख्य माग हो । यस क्षेत्रमा केही पुनर्विचार हुने सम्भावना भने बजारले गरेको छ, तर ठूलो परिवर्तन हुने संकेत अझै छैन ।