९ कम्पनीको लाभांश घोषणा, कुनको कति ?

नेपाली शेयर न्यूज । आइतबार ९ वटा सूचीकृत कम्पनीले आर्थिक वर्ष २०८१/८२ का लागि लाभांश घोषणा गरेका छन्। रुरु जलविद्युत परियोजना, सूर्यज्योति लाइफ इन्स्योरेन्स, रिलायबल नेपाल लाइफ इन्स्योरेन्स, मिथिला लघुवित्त, महुली लघुवित्त, स्वरोजगार लघुवित्त, ग्लोबल आइएमई लघुवित्त, कालिका लघुवित्त र लाइफ इन्स्योरेन्स कर्पोरेशन (नेपाल) लिमिटेडले लाभांश प्रस्ताव गरेका हुन्।

रुरु जलविद्युत परियोजना लिमिटेड

कम्पनीले हाल कायम चुक्तापुँजीको १५.७९ प्रतिशत लाभांश घोषणा गरेको छ। जसमा १० प्रतिशत बोनस सेयर र ५.७९ प्रतिशत नगद लाभांश (करसहित) समावेश छ। लाभांश पारित गर्न कम्पनीले पुस २५ गते २०औँ वार्षिक साधारणसभा बोलाएको छ। सभा काठमाडौंको चाबहिलस्थित स्मार्ट प्यालेस एन्ड इभेन्टमा बिहान ११ बजे सुरु हुनेछ। लाभांश र सभा प्रयोजनार्थ कम्पनीले पुस १३ गते बुक क्लोज गर्ने निर्णय गरेको छ। यसअनुसार पुस ९ गतेसम्म कायम सेयरधनी मात्र लाभांश पाउन योग्य हुनेछन्।

सूर्यज्योति लाइफ इन्स्योरेन्स कम्पनी लिमिटेड

कम्पनीले सेयरधनीलाई १३ प्रतिशत नगद लाभांश वितरण गर्ने निर्णय गरेको छ। हाल कायम चुक्तापुँजी ५ अर्ब १ करोड १९ लाख ४७ हजार ७९७ रुपैयाँको आधारमा कुल ६५ करोड १५ लाख ५३ हजार २१३ रुपैयाँ नगद लाभांश (करसहित) प्रस्ताव गरिएको छ। लाभांश नेपाल बीमा प्राधिकरणको स्वीकृति र साधारणसभाबाट पारित भएपछि वितरण हुनेछ।

रिलायबल नेपाल लाइफ इन्स्योरेन्स कम्पनी

कम्पनीले १२ प्रतिशत नगद लाभांश घोषणा गरेको छ। हाल कायम चुक्तापुँजी ५ अर्ब १९ करोड ६८ लाख रुपैयाँको आधारमा करिब ६२ करोड ३५ लाख रुपैयाँ नगद लाभांश वितरण गरिने प्रस्ताव गरिएको छ। प्रस्ताव नियामक स्वीकृति र साधारणसभाबाट अनुमोदनपछि लागू हुनेछ।

मिथिला लघुवित्त वित्तीय संस्था

संस्थाले कुल १५ प्रतिशत लाभांश वितरण गर्ने निर्णय गरेको छ। जसमा १४.२५ प्रतिशत बोनस सेयर र ०.७५ प्रतिशत नगद लाभांश (करसहित) समावेश छ। लाभांश नेपाल राष्ट्र बैंकको स्वीकृति र साधारणसभाबाट पारित भएपछि वितरण गरिनेछ।

महुली लघुवित्त वित्तीय संस्था

महुली लघुवित्तले ५ प्रतिशत लाभांश घोषणा गरेको छ। यसमा ४.७५ प्रतिशत बोनस सेयर र ०.२५ प्रतिशत नगद लाभांश (कर प्रयोजनार्थ) समावेश छ। प्रस्ताव राष्ट्र बैंकको स्वीकृति र साधारणसभाबाट पारित भएपछि कार्यान्वयन हुनेछ।

स्वरोजगार लघुवित्त वित्तीय संस्था

संस्थाले हाल कायम चुक्तापुँजीको १५ प्रतिशत लाभांश प्रस्ताव गरेको छ। जसमा १४.२५ प्रतिशत बोनस सेयर र ०.७५ प्रतिशत नगद लाभांश (करसहित) रहेको छ। लाभांश राष्ट्र बैंकको स्वीकृति र साधारणसभाबाट अनुमोदनपछि वितरण हुनेछ।

कालिका लघुवित्त वित्तीय संस्था

कालिका लघुवित्तले कुल १०.५२६३ प्रतिशत लाभांश वितरण गर्ने निर्णय गरेको छ। यसमा १० प्रतिशत बोनस सेयर र ०.५२६३ प्रतिशत नगद लाभांश (कर प्रयोजनार्थ) समावेश छ। लाभांश राष्ट्र बैंकको स्वीकृति र साधारणसभाबाट पारित भएपछि सेयरधनीलाई वितरण गरिनेछ।

लाइफ इन्स्योरेन्स कर्पोरेशन (नेपाल) लिमिटेड

कम्पनीले हाल कायम चुक्तापुँजीको २१.०५ प्रतिशत नगद लाभांश (करसहित) वितरण गर्ने घोषणा गरेको छ। उक्त लाभांश नेपाल बीमा प्राधिकरणको स्वीकृति तथा आगामी वार्षिक साधारणसभाबाट अनुमोदन भएपछि सेयरधनीहरूलाई वितरण गरिनेछ।

ग्लोबल आइएमई लघुवित्त वित्तीय संस्था

कम्पनीले कुल ५ प्रतिशत लाभांश घोषणा गरेको छ। यसमा ४.७५ प्रतिशत बोनस सेयर र ०.२५ प्रतिशत नगद लाभांश (करसहित) समावेश छ। प्रस्ताव नियामक स्वीकृति र साधारणसभाबाट पारित भएपछि लागू हुनेछ।