अब सरकारी ऋणपत्र पनि दोस्रो बजारमा कारोबार खुला गर्ने तयारी

नेपाली शेयर न्यूज । आन्तरिक ऋण व्यवस्थापनको औजार, सरकारी ऋणपत्रलाई पनि पनि शेयरजस्तै दोस्रो बजारमा कारोबार खुला गर्ने सरकारको तयारी रहेको छ । यसका लागि अर्थ मन्त्रालयले गत असोज २०८१ मै आन्तरिक ऋण (निष्काशन तथा व्यवस्थापन), कार्यविधि, २०८१ जारी गरिसकेको छ ।

सरकारी ऋणपत्रहरू ट्रेजरी बिल, नागरिक बचतपत्र, विकास ऋणपत्र र वैदेशिक रोजगार बचतपत्रलाई पुँजी बजारका अन्य कम्पनीको शेयरजस्तै नेपाल स्टक एक्सचेञ्ज लि. (नेप्से)मार्फत दोस्रो बजारमा कारोबार हुने व्यवस्था मिलाएको छ ।

प्रारम्भिक चरणमा नेपाल सरकारबाट जारी गरिने नागरिक बचतपत्र तथा वैदेशिक रोजगार बचतपत्रको प्राथमिक निष्कासन तथा दोस्रो बजारको कारोबारका लागि सार्वजनिक ऋण व्यवस्थापन कार्यालयले बजार निर्माताको खोजी गरेको छ ।

११ फागुन २०८२ मा एक सूचना जारी गर्दै कार्यालयले १५ दिनको म्याद राखेर बजार निर्मातालाई दरखास्त आह्वान गरेको छ । आन्तरिक ऋण निष्कसन कार्यविधि, २०८१ अनुसार बजार निर्माताको रुपमा कार्य गर्न नेपाल राष्ट्र बैंकबाट इजाजतपत्र प्राप्त क, ख र ग वर्गका बैंक तथा वित्तीय संस्थाहरूले आवेदन दिन सक्ने कार्यालयले जनाएको छ ।

वित्तीय कारोबार गर्न प्राप्त इजाजतपत्रको प्रतिलिपि वा कागजातको प्रतिलिपिसहित स्थायी लेखा नं. (प्यान)को प्रतिलिपि र कर चुक्ता प्रमाणपत्रको प्रतिलिपि अनिवार्य रहेको कार्यालयले जनाएको छ ।