बैंकहरुमा अधिक तरलता : शेयर बजारमा लगानीको अवसर

नेपाली शेयर न्यूज । बैंक तथा वित्तीय संस्थाहरूमा सर्वसाधारणबाट संकलित निक्षेपको आकार हाल पौने ७६ खर्ब रुपैयाँ पुगेको छ । नेपाल राष्ट्र बैंकका अनुसार, १२ डिसेम्बरमा ७५ खर्ब ७० अर्ब रुपैयाँ रहेको निक्षेप १६ डिसेम्बरसम्ममा थप ५ अर्ब रुपैयाँले वृद्धि भएको हो।

निरन्तर बढ्दो निक्षेपले राष्ट्र बैंकको तरलता व्यवस्थापनमा चुनौती थपेको छ । यही अवधिमा बैंक तथा वित्तीय संस्थाहरूले ५६ खर्ब ७५ अर्ब रुपैयाँ मात्र कर्जा लगानी गरेका छन्। समीक्षा अनुसार, बैंकहरूले औसत ७४.०७ प्रतिशत मात्र कर्जा-निक्षेप अनुपात (सीडी रेसियो) कायम गरेका छन्, जसको अर्थ १२ खर्ब रुपैयाँभन्दा बढी लगानीयोग्य तरलता बैंकहरूमा उपलब्ध छ। कर्जा लगानीको दबाब बढ्दै गएपछि राष्ट्र बैंकले बोलकबोलमार्फत निरन्तर तरलता प्रशोचन गर्दै आएको छ।

शेयर बजारमा लगानीको अवसर

जब बैंकमा तरलता अधिक हुन्छ, बैंकहरूले अतिरिक्त रकम कर्जा वा लगानीको रूपमा बजारमा प्रवाह गराउँछन् । यसले बजारमा लगानीको माग बढाउने र शेयर बजारमा सेयर मूल्यलाई स्थिर राख्न मद्दत गर्छ । यस अवस्थामा, लगानीकर्ताहरूले नयाँ शेयरमा प्रवेश गर्न सजिलो अवसर पाउँछन् । बैंकमा पर्याप्त तरलता हुँदा कर्जा लगानी र वित्तीय उत्पादमा पहुँच सजिलो हुन्छ । यसले मात्र शेयर बजारमा मात्रै नभई समग्र आर्थिक गतिविधिमा पनि सकारात्मक प्रभाव पार्छ । त्यसैले, लगानीकर्ताले यो समयमा शेयर बजारमा प्रवेश गरेर दिगो लाभको अवसर पाउन सक्छन्। तर, बजार अध्ययन र जोखिम मूल्याङ्कन गर्नु आवश्यक हुनेछ ।

शेयर लोनको माग उच्च

चालु आर्थिक वर्ष २०८२।८३ को पहिलो ४ महिना कात्तिकसम्म बैंकहरुबाट प्रवाह हुने शेयर धितो कर्जा साढे ३५ प्रतिशतले बढेको छ। नेपाल राष्ट्र बैंकले सार्वजनिक गरेको तथ्यांकअनुसार चालु आर्थिक वर्षको कात्तिकसम्म बैंकहरुबाट १ खर्ब ४६ अर्ब २२ करोड ४८ लाख रुपैयाँ शेयर धितो कर्जा गएको छ। अघिल्लो आर्थिक वर्ष २०८१।८२ को कात्तिकसम्म बैंकहरुबाट १ खर्ब ७ अर्ब ७६ करोड ७९ लाख रुपैयाँ कर्जा गएको थियो। यो हिसाबले अघिल्लो वर्षको तुलनामा समीक्षा वर्षमा बैंकहरुबाट शेयर धितो कर्जा ३५.६८ प्रतिशतले बढेको छ।

चालु आर्थिक वर्षको कात्तिकसम्म बैंकहरुबाट १ करोड रुपैयाँ माथिको रेन्जको कर्जा १ खर्ब ३ अर्ब ३ करोड ५८ लाख रुपैयाँ शेयर धितो कर्जा गएको छ। अघिल्लो वर्ष कात्तिकसम्म यो रेन्जको कर्जा ७१ अर्ब ३ करोड २५ लाख रुपैयाँ गएको थियो। यो रेन्जको कर्जाको माग ४५.०५ प्रतिशतले बढेको छ।

समीक्षा अवधिसम्म बैंकहरुबाट ५० लाख रुपैयाँ माथि १ करोड रुपैयाँसम्मको रेन्जको कर्जा १६ अर्ब ६६ करोड ६६ लाख रुपैयाँ, २५ लाख रुपैयाँदेखि ५० लाख रुपैयाँसम्मको रेन्जको कर्जा १७ अर्ब ९६ करोड ९४ लाख रुपैयाँ र २५ लाख रुपैयाँसम्मको रेन्जको कर्जा ८ अर्ब ५५ करोड ३० लाख रुपैयाँ गएको छ। अघिल्लो वर्ष कात्तिकसम्म बैंकहरुबाट ५० लाख रुपैयाँ माथि १ करोड रुपैयाँसम्मको रेन्जको कर्जा १३ अर्ब ७८ करोड ८ लाख रुपैयाँ, २५ लाख रुपैयाँदेखि ५० लाख रुपैयाँसम्मको रेन्जको कर्जा १५ अर्ब ४२ करोड १६ लाख रुपैयाँ र २५ लाख रुपैयाँसम्मको रेन्जको कर्जा ७ अर्ब ५३ करोड ३० लाख रुपैयाँ गएको थियो।

अघिल्लो वर्षको तुलनामा समीक्षा अवधिमा ५० लाख रुपैयाँ माथि १ करोड रुपैयाँसम्मको रेन्जको कर्जा २०.९४ प्रतिशत, २५ लाख रुपैयाँदेखि ५० लाख रुपैयाँसम्मको रेन्जको कर्जा १६.५२ प्रतिशत र २५ लाख रुपैयाँसम्मको रेन्जको कर्जा भने १३.५४ प्रतिशतले बढेको छ ।