साना किसान विकास लघुवित्तले डाक्यो साधारण सभा

नेपाली शेयर न्यूज । साना किसान विकास लघुवित्त वित्तीय संस्था लिमिटेडले आफ्नो २४औँ वार्षिक साधारण सभा पुस २५ गते काठमाडौंको बबरमहलस्थित कार्की ब्याङ्क्वेटमा बिहान ११:१५ बजेबाट आयोजना गर्ने भएको छ। मंसिर २६ गते बसेको सञ्चालक समितिको बैठकले सभा डाक्ने निर्णय गरेको हो।

सभामा गत आवका लागि १४.२५ प्रतिशत बोनस सेयर र ०.७५ प्रतिशत नगद लाभांश (कर प्रयोजनका लागि) गरी कुल १५ प्रतिशत लाभांश वितरणको प्रस्ताव पारित गर्ने योजना रहेको छ। साथै, संस्थाको अधिकृत पूँजी ५ अर्बबाट ८ अर्ब पुर्‍याउने र सोअनुसार प्रबन्धपत्र तथा नियमावलीमा संशोधन गर्ने प्रस्ताव पनि सभामा प्रस्तुत हुनेछ।

यसैगरी, सभा दौरान गत आवको वार्षिक प्रतिवेदन, लेखापरीक्षकको प्रतिवेदनसहित वासलात, नाफा–नोक्सान हिसाब तथा नगद प्रवाह विवरण लगायतका वित्तीय विवरणहरूमाथि छलफल गरी पारित गर्ने र चालु आवका लागि लेखापरीक्षकको नियुक्ति तथा पारिश्रमिक निर्धारण गर्ने प्रस्तावहरु पनि पारित गरिने छन्।

साधारण सभा तथा लाभांश वितरण प्रयोजनका लागि संस्थाले पुस ९ गते एक दिनका लागि बुक क्लोज गर्ने निर्णय गरेको छ। यसअनुसार, पुस ८ गतेसम्म नेप्सेमा कारोबार भई कायम भएका सेयरधनीहरू मात्रै सभामा सहभागी हुन र लाभांश पाउन योग्य हुनेछन्।