सिनर्जी पावरको लाभांश घोषणा, पुस २८ गते वार्षिक साधारणसभा

नेपाली शेयर न्यूज । सिनर्जी पावर डेभलपमेन्ट लिमिटेडको पुस ३ गते बसेको सञ्चालक समितिको बैठकले लाभांश घोषणा गर्दै कम्पनीको १९औं वार्षिक साधारणसभा बोलाएको छ।

कम्पनीको साधारणसभा पुस २८ गते सोमबार काठमाडौंको भाटभटेनीस्थित आम्रपाली ब्याङ्क्वेटमा बिहान ११ बजेदेखि सुरु हुनेछ। सभाले असार मसान्तसम्म कायम चुक्ता पूँजीको १० प्रतिशत बोनस शेयर तथा ०.५२६३ प्रतिशत नगद लाभांश (कर प्रयोजनार्थ) वितरण गर्ने प्रस्ताव पारित गर्नेछ।

सभामा गत आर्थिक वर्ष (आव) को वार्षिक प्रतिवेदन र लेखापरीक्षकको प्रतिवेदनसहितका वित्तीय विवरणहरू पारित गरिनेछ। साथै चालू आर्थिक वर्षका लागि लेखापरीक्षकको नियुक्ति र निजको पारिश्रमिक निर्धारणसम्बन्धी प्रस्ताव पनि सभामा पेश हुनेछ।

त्यसैगरी, १ जना महिला सहित ४ जना सञ्चालकको निर्वाचन, स्वतन्त्र सञ्चालकको नियुक्ति अनुमोदन, सञ्चालक समिति गठन तथा नियामक निकायबाट कुनै निर्देशन वा सुझाव प्राप्त भएमा सोहीअनुसार कार्यान्वयन गर्न सञ्चालक समितिलाई अख्तियारी दिने प्रस्ताव पनि सभाले पारित गर्नेछ।

साधारणसभा तथा लाभांश वितरण प्रयोजनार्थ कम्पनीले पुस १४ गते एक दिनका लागि बुक क्लोज गर्ने निर्णय गरेको छ। त्यसअनुसार पुस १३ गतेसम्म नेप्सेमा कायम शेयरधनी मात्रै साधारणसभामा सहभागी हुन र घोषित लाभांश प्राप्त गर्न योग्य हुनेछन्।