मंसिरमा पनि राजस्व लक्ष्य पूरा भएन, ८४ प्रतिशत मात्रै प्रगति

नेपाली शेयर न्यूज । चालू आर्थिक वर्ष २०८२/८३ को पहिलो पाँच महिनामा सरकारले ४ खर्ब ९ अर्ब ७८ करोड रुपैयाँ राजस्व संकलन गरेको छ। अर्थ मन्त्रालयका अनुसार मंसिरसम्म सरकारले ५ खर्ब २० अर्ब ४४ करोड रुपैयाँ राजस्व संकलन गर्ने लक्ष्य राखेको भए पनि लक्ष्यभन्दा १ खर्ब १० अर्ब ६६ करोड रुपैयाँ कम राजस्व उठेको हो।

समीक्षा अवधिमा सरकारले लक्ष्यको ७८.७४ प्रतिशत मात्र राजस्व संकलन गर्न सफल भएको छ। मंसिर महिनामा मात्रै ८० अर्ब २७ करोड रुपैयाँ राजस्व संकलन भएको छ। सो महिनाका लागि सरकारले ९५ अर्ब २० करोड रुपैयाँ राजस्व संकलन गर्ने लक्ष्य लिएको थियो। यस अनुसार मंसिरमा राजस्व लक्ष्यको ८४.३१ प्रतिशत प्रगति हासिल भएको अर्थ मन्त्रालयले जनाएको छ।

गत आर्थिक वर्ष २०८१/८२ को मंसिरसम्म सरकारले ४ खर्ब ५ अर्ब ७७ करोड रुपैयाँ राजस्व संकलन गरेको थियो। त्यतिबेला मंसिरसम्मको लक्ष्य ४ खर्ब ९५ अर्ब २ करोड रुपैयाँ रहेको थियो। गत आवको सोही अवधिसँग तुलना गर्दा चालू आवमा राजस्व संकलन जम्मा ४ अर्ब रुपैयाँले मात्र वृद्धि भएको देखिन्छ।

चालू आर्थिक वर्षका लागि सरकारले कुल १४ खर्ब ८० अर्ब रुपैयाँ राजस्व संकलन गर्ने लक्ष्य निर्धारण गरेको छ। लक्ष्यअनुसारको राजस्व संकलन चुनौतीपूर्ण देखिएको भन्दै अर्थ मन्त्रालयले आगामी महिनामा संकलन सुधार गर्न विभिन्न उपाय अपनाइने जनाएको छ।