५ वर्ष पुरानो नगद लाभांश बुझ्न सेयरधनीलाई आरम्भ चौतारी लघुवित्तको आग्रह

काठमाडौं । आरम्भ चौतारी लघुवित्त वित्तीय संस्था लिमिटेडले पुरानो लाभांश नबुझेका सेयरधनीहरूलाई आफ्नो नगद लाभांश बुझ्न आग्रह गरेको छ। कम्पनीले हालै जारी गरेको सूचनामा विभिन्न साधारण सभाबाट पारित भएको ५ वर्ष पुरानो नगद लाभांश अझै नबुझिएका सेयरधनीलाई लाभांश लिन सम्पर्क गर्न अनुरोध गरेको छ।

सेयरधनीहरूले संस्थाको आधिकारिक वेबसाइटमा प्रकाशित विवरण अनुसार आफ्नो परिचयपत्रसहित सूचना प्रकाशित भएको मितिबाट एक महिनाभित्र कम्पनीको सेयर रजिष्ट्रार मुक्तिनाथ क्यापिटलको कार्यालयमा सम्पर्क गरी नगद लाभांश बुझ्न सक्ने जानकारी संस्थाले दिएको छ।

कम्पनीले भनेका अनुसार सो अवधिभित्र लाभांश नलिएको खण्डमा बाँकी रकम लगानीकर्ता संरक्षण कोषमा जम्मा गरिने छ। यस कदमले सेयरधनीको अधिकार सुरक्षित गर्दै कम्पनीको पारदर्शिता सुनिश्चित गर्ने उद्देश्य राखिएको छ।