नेपाली शेयर न्यूज । नेपाल उद्योग परिसंघका अध्यक्ष वीरेन्द्रराज पाण्डेले वित्तीय प्रणालीमा रोकिएको लगानी योग्य रकम नै अहिलेको ठूलो चुनौती भएको बताएका छन्। नेपाल आर्थिक पत्रकार संघ (नाफिज) को साधारण सभामा बोल्दै उनले यस्तो टिप्पणी गरेका हुन्।
अध्यक्ष पाण्डेका अनुसार बैंक तथा वित्तीय संस्थामा पर्याप्त तरलता भए पनि समग्र बजारमा माग बढ्न नसक्दा पैसा निष्क्रिय बनेको छ। उनले भने, “आन्तरिक अर्थतन्त्र चापमा छ। बैंकमा लगानी योग्य रकम पर्याप्त छ। ब्याज एकल बिन्दुमा भए पनि समग्र बजारको माग बढ्न सकेको छैन। अहिलेको सबैभन्दा ठूलो चुनौती हाम्रो प्रणालीमा रहेको लगानी योग्य रकम स्थिर हुनु हो। पैसा स्थिर बस्नु अर्थतन्त्रका लागि राम्रो पक्कै पनि होइन।”
उनले निजी क्षेत्रको लगानी विस्तार भए मात्र देशको अर्थतन्त्र बलियो हुने बताउँदै यसले रोजगारी, राजस्व र समृद्धतामा प्रत्यक्ष प्रभाव पार्ने उल्लेख गरे। “निजी क्षेत्रको लगानी बढ्यो भने मात्र अर्थतन्त्र विस्तार हुन्छ। अर्थतन्त्र सुदृढ भयो भने मात्र मुलुक समृद्ध हुन्छ। युवाले रोजगारी पाउँछन्, राज्यले राजस्व पाउँछ,” पाण्डेले भने।
बजारमा पैसा सक्रिय बनाउन सरकारले पुँजीगत खर्च वृद्धि गर्न आवश्यक रहेको उनको सुझाब छ। उनले चालू आर्थिक वर्षको पहिलो त्रैमाससम्म बजेट कार्यान्वयन सन्तोषजनक नदेखिएको बताए। “बजेट कार्यान्वयनका लागि सरकार कडाइका साथ प्रस्तुत हुनुपर्छ,” उनले भने।
अध्यक्ष पाण्डेले आर्थिक मुद्दालाई राजनीतिक प्राथमिकताभन्दा माथि राख्नुपर्ने आवश्यकता जोड दिए। “राजनीति भन्दा माथि आर्थिक मुद्दाहरूलाई पहिलो प्राथमिकतामा राख्नुपर्छ भन्ने विषयमा समान धारणा छ,” उनले स्पष्ट पारे।
