नेपाल राष्ट्र बैंकद्वारा पुनः २५ अर्बको ऋणपत्र जारी, आजै बोलकबोल

काठमाडौं । नेपाल राष्ट्र बैंकले वित्तीय बाजारमा तरलता व्यवस्थापन र सरकारी खर्चको आवश्यकता पुरा गर्न पुनः २५ अर्ब रुपैयाँ बराबरको विकास ऋणपत्र जारी गर्ने भएको छ। केन्द्रीय बैंकले गत सोमबार मात्रै २५ अर्बकै ऋणपत्र जारी गरेकोमा, आज पुस १६ गते फेरी अर्को ठूलो परिमाणको ऋणपत्र निष्कासन गर्न लागेको हो।

आज जारी हुने ऋणपत्रको नाम ‘नेपाल राष्ट्र बैंक ऋणपत्र २०८३ ख’ राखिएको छ। यस ऋणपत्र खरिदका लागि राष्ट्र बैंकबाट ‘क’, ‘ख’ र ‘ग’ वर्गको इजाजतपत्र प्राप्त बैंक तथा वित्तीय संस्थाहरूले आवेदन दिन सक्नेछन्। इच्छुक संस्थाहरूले आज मध्याह्न २ बजेसम्म अनलाइन माध्यमबाट बोलकबोल (Bidding) मा सहभागी हुन पाउनेछन्।

यो विकास ऋणपत्रको ब्याजदर बोलकबोलका माध्यमबाटै निर्धारण गरिने राष्ट्र बैंकले जनाएको छ। यो ऋणपत्रको अवधि एक वर्षको हुनेछ र यसको साँवा भुक्तानी २०८३ साल पुस १६ गते हुनेछ। लगानीकर्ताहरूले प्रत्येक ६ महिनामा (अर्धवार्षिक रूपमा) ब्याज प्राप्त गर्नेछन्।

ऋणपत्रमा न्यूनतम ५ करोड रुपैयाँ र सोभन्दा बढीको लागि ५ करोडकै दरले भाग लाग्ने गरी कुल आह्वान रकमसम्मको बोलपत्र पेश गर्न सकिने व्यवस्था गरिएको छ। खरिदकर्ताले यस ऋणपत्रलाई नेपाल राष्ट्र बैंक लगायत अन्य बैंक तथा वित्तीय संस्थाहरूमा धितोका रूपमा प्रयोग गरी कर्जा लिन सक्नेछन्।