शेयर बजारमा चार्टः लाइन चार्टले देखाउँछ बजारको दीर्घकालीन प्रवृत्ति

नेपाली शेयर न्यूज । शेयर बजारको प्राविधिक विश्लेषणमा विभिन्न प्रकारका मूल्य चार्ट (Price Charts) प्रयोग हुँदै आएका छन्। पछिल्लो समय नयाँ तथा अनुभवी लगानीकर्ताबीच चार्ट अध्ययनप्रतिको चासो बढ्दै गएको छ। बजार विश्लेषकहरूका अनुसार सही चार्ट बुझ्न सकेमा मूल्य प्रवृत्ति र सम्भावित दिशा अनुमान गर्न सजिलो हुन्छ।

मूल्य चार्टका आधारभूत सूचकहरू

मूल्य चार्टमा मुख्य रूपमा Opening Price (खुल्ने मूल्य), High Price (उच्च मूल्य), Low Price (न्यून मूल्य) र Closing Price (बन्द मूल्य) समेटिन्छन्। यी सूचकहरूले कुनै निश्चित अवधिमा शेयरको व्यवहार देखाउँछन्।

बार चार्ट (Bar Chart)

बार चार्ट मूल्य उतार–चढाव र कारोबारको दायरा देखाउने लोकप्रिय माध्यम हो। यसमा प्रत्येक दिन वा अवधिका लागि ठाडो रेखा प्रयोग गरिन्छ, जसले उच्च र न्यून मूल्य जनाउँछ। खुल्ने र बन्द हुने मूल्य ठाडो रेखामा साना तेर्सा ड्यासद्वारा संकेत गरिन्छ।

लाइन चार्ट (Line Chart)

लाइन चार्टले समयक्रममा कुनै एक भेरिएबल जस्तै. सेयर मूल्य, सूचकांक वा कारोबार परिमाणको परिवर्तन देखाउँछ। मूल्यहरूलाई जोड्दै बनाइएको रेखाले समग्र प्रवृत्ति बुझ्न मद्दत गर्छ, तर यसले दैनिक उच्च, न्यून, खुल्ने र बन्द मूल्यजस्ता विवरण भने नदेखाउने विश्लेषकहरू बताउँछन्।

पोइन्ट एन्ड फिगर चार्ट (Point and Figure Chart)

सामान्य लगानीकर्ताबीच कम प्रचलित भए पनि पोइन्ट एन्ड फिगर चार्टको इतिहास पुरानो छ। यसले समय र कारोबार परिमाणभन्दा मूल्य परिवर्तनलाई प्राथमिकता दिन्छ। विश्लेषकले ‘महत्त्वपूर्ण मूल्य परिवर्तन’ निर्धारण गरेपछि चार्ट बनाइन्छ, जहाँ बढ्दो मूल्यलाई “X” र घट्दो मूल्यलाई “O” ले जनाइन्छ।

क्यान्डलस्टिक चार्ट (Candlestick Chart)

क्यान्डलस्टिक चार्ट बार चार्टसँग मिल्दोजुल्दो भए पनि रंगको प्रयोगले बजारको मनोविज्ञान स्पष्ट देखाउँछ। सेयर खुल्नेभन्दा माथि बन्द भएमा प्रायः सेतो वा हरियो क्यान्डल देखिन्छ, जबकि मूल्य घटेको दिन रातो वा कालो क्यान्डल प्रयोग गरिन्छ। यसले छोटो अवधिको ट्रेन्ड र उल्टो संकेत (reversal) पहिचान गर्न सहयोग पुर्‍याउँछ। यी चार्टहरूको सही प्रयोगले लगानी निर्णयलाई अझ सूचित र व्यवस्थित बनाउन सक्छ।