विश्व लगानीकर्ता सप्ताह २०२५: धितोपत्र अभौतिकीकरण गर्न बोर्डको आग्रह

नेपाली शेयर न्यूज । नेपाल धितोपत्र बोर्डले World Investor Week 2025 को अवसरमा लगानीकर्ता सचेतना सन्देश जारी गर्दै लगानीकर्तालाई जानकारीपूर्ण र सुरक्षित रहन आग्रह गरेको छ। “Stay informed. Stay protected.” भन्ने नारासहित बोर्डले लगानी सुरक्षाका उपायहरू अपनाउन जोड दिएको छ।

बोर्डले आफूसँग कागजी प्रमाणपत्रका रूपमा रहेका धितोपत्रलाई कारोबार योग्य बनाउन बोर्डबाट अनुमति प्राप्त निक्षेप सदस्य (डीपी) मार्फत अनिवार्य रूपमा अभौतिकीकरण (डिम्याट) गर्न आग्रह गरेको छ। कागजी धितोपत्र अभौतिकीकरण नगर्दा कारोबार, हस्तान्तरण तथा सुरक्षामा समस्या आउन सक्ने भन्दै समयमै डिम्याट गर्न बोर्डले सचेत गराएको छ।

नेपाल धितोपत्र बोर्डका अनुसार अभौतिकीकरण प्रक्रियाले धितोपत्रको सुरक्षित भण्डारण, छिटो कारोबार, पारदर्शिता र जोखिम न्यूनीकरणमा सहयोग पुग्छ। यसले लगानीकर्तालाई ठगी, हराउने वा नक्कली प्रमाणपत्रको जोखिमबाट जोगाउने विश्वास बोर्डले व्यक्त गरेको छ।

विश्व लगानीकर्ता सप्ताह २०२५ अन्तर्गत बोर्डले लगानीकर्ता शिक्षा, सचेतना तथा संरक्षणलाई प्राथमिकतामा राख्दै विभिन्न कार्यक्रम सञ्चालन गर्ने जनाएको छ। बोर्डले सबै लगानीकर्तालाई जानकारीमा रहन, अधिकार बुझ्न र सुरक्षित लगानी अभ्यास अपनाउन आह्वान गरेको छ।