नेप्से एक वर्षमा २८४ अंकले घट्यो : राष्ट्र बैंक

काठमाडौं । नेपाल राष्ट्र बैंकले सार्वजनिक गरेको पछिल्लो तथ्यांक अनुसार नेपाल स्टक एक्सचेन्ज (नेप्से) सूचकाङ्क एक वर्षको अवधिमा २८४ अंकले घटेर २४८७.१८ बिन्दुमा पुगेको छ। गत वर्षको असोज मसान्तमा नेप्से २७४२.८९ बिन्दुमा रहेको थियो।

यस्तै, धितोपत्र बजार पूँजीकरण पनि दुई खर्बभन्दा बढीले घटेको छ। गत वर्षको असोज मसान्तमा बजार पूँजीकरण ४३ खर्ब ६१ अर्ब ४५ करोड रुपैयाँ थियो भने यस वर्षको असोज मसान्तमा यो घटेर ४१ खर्ब ५७ अर्ब ९० करोड रुपैयाँमा सीमित भएको छ। बजार पूँजीकरण GDP को अनुपात पनि गत वर्षको ७६.३९ प्रतिशतबाट यस वर्ष ६८.०८ प्रतिशतमा झरेको छ।

नेप्सेमा सूचीकृत कम्पनीको कुल संख्या २७६ पुगेको छ। जसमध्ये १३२ बैंक तथा वित्तीय संस्था र बीमा कम्पनी, ९४ हाइड्रोपावर कम्पनी, २३ उत्पादन तथा प्रशोधन कम्पनी, ७ होटल, ७ लगानी कम्पनी, ४ व्यापारिक संस्था र ९ अन्य समूहका छन्। गत वर्ष यसै अवधिमा सूचीकृत कम्पनी २६७ थिए।