चार विकास बैंकको लाभांश घोषणा: कुनको कति ?

काठमाडौं । आर्थिक वर्ष २०८१/८२ का लागि हालसम्म चारवटा विकास बैंकले आफ्ना सेयरधनीहरूका लागि लाभांश घोषणा गरेका छन्। नेप्सेमा सूचीकृत ती बैंकहरूमा मितेरी विकास बैंक, गरिमा विकास बैंक, मुक्तिनाथ विकास बैंक र कामना सेवा विकास बैंक रहेका छन्।

मितेरी विकास बैंकले सेयरधनीहरूलाई कुल १० प्रतिशत लाभांश वितरण गर्ने घोषणा गरेको छ, जसको सम्पूर्ण हिस्सा नगद लाभांश हुनेछ। बैंकले मंसिर ६ गते साधारण सभा बोलाएको छ, जसको आयोजना सुनसरीको धरान–१ स्थित सुनसरी उद्योग वाणिज्य संघमा बिहान ११ बजेदेखि हुने जनाएको छ।

साधारण सभा तथा लाभांश वितरण प्रयोजनका लागि बैंकले कात्तिक २३ गतेदेखि मंसिर ६ गतेसम्म बुक क्लोज गर्ने निर्णय गरेको छ। त्यसअनुसार कात्तिक २३ गतेअघि कायम सेयरधनीहरू मात्र लाभांश पाउने र सभामा सहभागी हुन योग्य हुनेछन्।

त्यस्तै, कामना सेवा विकास बैंकले गत आर्थिक वर्षको नाफाबाट कुल १५.७८९५ प्रतिशत लाभांश वितरण गर्ने घोषणा गरेको छ। जसमा १० प्रतिशत बोनस सेयर र ५.७८९५ प्रतिशत नगद लाभांश समावेश छ। बैंकले आफ्नो साधारण सभा सम्पन्न गरिसकेको जनाएको छ।

यस्तै, गरिमा विकास बैंक र मुक्तिनाथ विकास बैंकले पनि आफ्ना सेयरधनीहरूका लागि लाभांश प्रस्ताव अघि सारेका छन्। यी बैंकहरूको लाभांश प्रस्ताव स्वीकृत भएपछि सेयरधनीहरूले आगामी दिनमा लाभांश पाउनेछन्। गरिमा विकास बैंकले गत आर्थिक वर्षको नाफाबाट कुल १०.५३ प्रतिशत लाभांश वितरण गर्ने घोषणा गरेको छ। जसमा ६ प्रतिशत बोनस सेयर र कर प्रयोजनसहित ४.५३ प्रतिशत नगद लाभांश समावेश छ।

बैंकले आफ्नो १९औं वार्षिक साधारण सभा कात्तिक २७ गते बिहीबार बिहान ११ बजे पोखरा १७ बिरौटा स्थित होटल पोखरा ग्राण्डमा आयोजना गर्ने भएको छ। बैंकले कात्तिक १८ गते बुक क्लोज गर्ने निर्णय गरेकोले कात्तिक १७ गतेसम्म नेप्सेमा कारोबार भएका सेयरधनीहरू लाभांशका हकदार हुनेछन्।

मुक्तिनाथ विकास बैंकले पनि गत आर्थिक वर्षको नाफाबाट कुल १८.२ प्रतिशत लाभांश वितरण गर्ने निर्णय गरेको छ। जसमा १३.५३ प्रतिशत बोनस सेयर र ४.६७ प्रतिशत नगद लाभांश समावेश छ। बैंकले कात्तिक १५ गते साधारण सभा आयोजना गरिरहेको छ।