नबिल बैंकका ३ संस्थापक शेयरधनीका १ लाख २५ हजार कित्ता शेयर बिक्रीमा

काठमाडौं । नबिल बैंक लिमिटेडले आफ्ना तीन जना संस्थापक शेयरधनीको स्वामित्वमा रहेको कुल १ लाख २५ हजार कित्ता संस्थापक शेयर बिक्रीमा राखेको छ। बैंकका संस्थापक जीतबहादुर श्रेष्ठ, जिज्ञाशा अर्याल र जश श्रेष्ठको स्वामित्वका ती शेयर संस्थापक शेयरधनीहरूबीच नै खरीद–बिक्री प्रक्रियामा ल्याइएको हो।

बैंकका अनुसार जीतबहादुर श्रेष्ठ र जिज्ञाशा अर्यालका तर्फबाट ५०–५० हजार कित्ता तथा जश श्रेष्ठका तर्फबाट २५ हजार कित्ता शेयर बिक्रीका लागि पेश गरिएको छ।

हाल यस शेयर खरिदका लागि नबिल बैंकका विद्यमान संस्थापक शेयरधनीहरूले मात्र निवेदन दिन पाउनेछन्। इच्छुकले आफूले किन्न चाहेको शेयर संख्या र प्रस्तावित मूल्य उल्लेख गरी गोप्य शिलबन्दी निवेदन ३५ दिनभित्र बैंकको दरबारमार्गस्थित केन्द्रीय कार्यालयमा रहेको कम्पनी सचिवको कार्यालयमा बुझाउनु पर्नेछ।

जश श्रेष्ठका २५ हजार कित्ता शेयरको न्यूनतम मूल्य प्रतिकित्ता ३०१ रुपैयाँ १० पैसा तोकिएको बैंकले जनाएको छ। बाँकी १ लाख कित्ता शेयरका लागि भने न्यूनतम मूल्य निर्धारण गरिएको छैन। निर्धारित समयभित्र संस्थापक शेयरधनीबाट खरीदका लागि निवेदन नआएमा बाँकी शेयर सर्वसाधारणलाई बिक्री गर्ने प्रक्रिया अघि बढाइने नबिल बैंकले जानकारी दिएको छ।