यी ६ कम्पनीको लाभांश सुरक्षित गर्ने अन्तिम दिन

काठमाडौं । नेपाल स्टक एक्सचेन्ज (नेप्से) मा सूचीकृत विभिन्न कम्पनीहरूले लाभांश वितरणका घोषणा गर्दै वार्षिक साधारणसभा बोलाएका छन्। आजसम्म कायम रहेका शेयरधनीहरूले कृषि विकास बैंक, शाइन रेसुङ्गा डेभलपमेन्ट बैंक, नेपाल इन्फ्रास्ट्रक्चर बैंक, सर्वोत्तम सिमेन्ट, बरुण हाइड्रोपावर र ङादी ग्रुप पावरका लाभांश पाउनेछन्।

कृषि विकास बैंकले चुक्ता पूँजीको ३.५% बोनस शेयर र ९.७५% नगद लाभांश (करसहित) वितरण गर्ने प्रस्ताव गरेको छ। अविमोच्य अग्राधिकार शेयरधनीलाई ६% नगद लाभांश दिने योजना छ। यो प्रस्ताव पारित गर्न बैंकले मंसिर २९ गते भक्तपुरस्थित केन्द्रीय तालिम प्रतिष्ठानमा बिहान ११ बजे १९औं वार्षिक साधारणसभा बोलाएको छ।

शाइन रेसुङ्गा डेभलपमेन्ट बैंकले चुक्ता पूँजीको ३% बोनस शेयर र १०% नगद लाभांश (करसहित) वितरण गर्नेछ। यसका लागि बैंकले मंसिर २६ गते बुटवलस्थित होटल सेफ्रेन सि.के प्रालिमा दिउँसो १२:३० बजे १७औं वार्षिक साधारणसभा बसाउने छ।

नेपाल इन्फ्रास्ट्रक्चर बैंकले चुक्ता पूँजीको ६.३१५८% नगद लाभांश (करसहित) घोषणा गरेको छ। लाभांश पारित गर्न मंसिर २३ गते काठमाडौंको बत्तिसपुतलीस्थित अनुपम फुडल्याण्ड एण्ड ब्याङ्क्वेटमा बिहान ९ बजे ७औं वार्षिक साधारणसभा बोलाइएको छ।

सर्वोत्तम सिमेन्टले चुक्ता पूँजीको ५% बोनस शेयर र १५% नगद लाभांश (करसहित) वितरण गर्ने निर्णय गरेको छ। यो प्रस्ताव पारित गर्न कम्पनीले मंसिर २६ गते भैरहवास्थित होटल सिद्धार्थ भिलासामा बिहान ११ बजे ७औं वार्षिक साधारणसभा बसाउनेछ।

वरुण हाइड्रोपावरले चुक्ता पूँजीको ४.७५% बोनस शेयर तथा ०.२५% नगद लाभांश (करसहित) वितरण गर्ने प्रस्ताव गरेको छ। यसका लागि कम्पनीले काठमाडौंको शंखपार्कस्थित स्मार्ट दरबारमा बिहान ९:३० बजे २२औं वार्षिक साधारणसभा बोलाएको छ।

त्यस्तै, ङादी ग्रुप पावरले पनि चुक्ता पूँजीको ४.७५% बोनस शेयर र ०.२५% नगद लाभांश (करसहित) प्रदान गर्ने जनाएको छ। कम्पनीले मंसिर २५ गते त्यही स्थान अर्थात् स्मार्ट दरबारमा बिहान ९:३० बजे १२औं वार्षिक साधारणसभा आयोजना गर्नेछ।