बुधबार सेयर बजारमा सामान्य गिरावट

काठमाडौं । लगातार दोस्रो दिन उकालो लागेको सेयर बजार बुधबार भने खुम्चिएको छ । अघिल्लो दिनको वृद्धि निरन्तरता दिँदै मंगलबार नेप्से परिसूचक १५.७० अंकले बढेर २५६६.०७ बिन्दुमा पुगेको थियो । बुधबार भने दोहोरो अंकले घट्यो ।

बजार पछिल्लो समय निरन्तर सुस्त हुँदै गएको छ भने अर्कोतिर लगानीकर्ता निराश छाएको छ । बैंक तथा वित्तीय संस्थाहरूले आकर्षक लाभांश प्रस्ताव गरिरहेका भएपनि बजार अपेक्षाअनुसार सक्रिय हुन सकेको छैन । मंगलबार बसेको मन्त्रिपरिषद् बैठकले नेपाल स्टक एक्स्चेन्ज लिमिटेड (नेप्से) को संरचना, प्रणाली र सञ्चालन सुधारका लागि उच्चस्तरीय सुझाव समिति गठन गरेको भएपनि लगानीकर्ताको मनोबल भने माथि उठ्न सकेको छैन ।

पछिल्लो समय बैंकको ब्याजदर निरन्तर घट्दै भएको छ । तर पनि सेयर बजारमा भने उत्साह आउन सकेको छैन । राजनीतिक अस्थिरता र आगामी आन्दोलनका खबरहरूले लगानीकर्तामा जोखिम लिने डर बढाएको छ । बुधबार नेप्से ४.९८ अकंले घटेर २५६१.०८ बिन्दुमा कायम भएको छ भने ३३८ कम्पनीको ८३ लाख ८८ हजार कित्ता शेयर किनबेच हुँदा ३ अर्ब ७७ करोड ८६ लाख रुपैयाँको शेयर कारोबार भएको छ । यसदिन ९ उपसूचक राताम्य भएका छन् । विकास बैंक समूहको शेयर सर्वाधिक १.०९ प्रतिशतले घटेको छ । ७७ कम्पनीको शेयर मूल्य बढेको छ भने १७० कम्पनीको घटेको छ ।

यी हुन् सर्वाधिक कारोबार भएका कम्पनी

नेपाल स्टक एक्सचेञ्ज (नेप्से) मा बुधबार करिब पौने ४ अर्ब रुपैयाँ बराबरको कारोबार भएको छ । दिनभरको कारोबारमा बरुण हाइड्रोपावर सर्वाधिक कारोबार गर्दै पहिलो स्थानमा रहेको छ । बरुण हाइड्रोपावरले २७ करोड ४० लाख रुपैयाँ बराबरको सेयर किनबेच गर्दै शीर्ष स्थान सुरक्षित ग¥यो । त्यसपछि सहास ऊर्जा १९ करोड ६० लाख रुपैयाँको कारोबारसँगै दोस्रो स्थानमा रह्यो । तेस्रोमा राधी विद्युत् १५ करोड ९४ लाख रुपैयाँको कारोबार गरेको छ भने युनियन हाइड्रोपावरले ११ करोड ४ लाख रुपैयाँको कारोबार गर्दै चौथो स्थान सुरक्षित गर्‍यो।

त्यसैगरी सिनर्जी पावरको कारोबार १० करोड ८७ लाख रुपैयाँ, शिवम सिमेन्टको १० करोड ६४ लाख, एनआरएन इन्फ्रास्ट्रक्चरको १० करोड ४८ लाख, माउन्टेन इनर्जीको ८ करोड ९३ लाख, नेपाल पुनर्बीमा कम्पनीको ८ करोड ६ लाख र दरमखोला हाइड्रोको ७ करोड २ लाख रुपैयाँ रहेको नेप्सेले जनाएको छ ।

सबैभन्दा बढी कारोबार गर्ने ब्रोकर

बुधबार ब्रोकर नम्बर ५८ नासा सेक्युरिटीज कम्पनी लिमिटेडले २ अर्ब ९ करोड ४८ लाख रुपैयाँको खरिद गरेका छ भने ३ अर्ब ६९ करोड ८६ लाखको सेयर बिक्री गरेको छ । त्यस्तै, भिजन सेक्युरिटीजले १ अर्ब ४८ करोड रुपैयाँ खरिद र १ अर्ब ३२ करोड रुपैयाँ बिक्री, सानी सेक्युरिटीजले १ अर्ब ५० करोड खरिद र ९८ करोड रुपैयाँ बिक्री र इम्पेरियल सेक्युरिटीजले १ अर्ब ४० करोड खरिद र ९९ करोड बिक्री गरेको छ । अनलाइन सेक्युरिटीजले १ अर्ब ३१ करोड खरिद र १ अर्ब ४ करोड बिक्री गरेको छ ।