शेयर बजारमा दोहोरो अंकले उकालो

काठमाडौं । नेपाल शेयर बजार लगातार दोस्रो दिन उकालो लागेको छ। अघिल्लो दिनको वृद्धि निरन्तरता दिंदै मंगलबार नेप्से परिसूचक १५.७० अंकले बढेर २५६६.०७ बिन्दुमा पुगेको छ। सेन्सेटिभ इन्डेक्स २.६५ अंक, फ्लोट इन्डेक्स १.१६ अंक, र सेन्सेटिभ फ्लोट इन्डेक्स ०.९६ अंक बढेका छन्।

यस दिन बजारको कारोबार रकम पनि बढेको छ। सोमबारको ३ अर्ब ९४ करोड बराबरको कारोबारपछि मंगलबार ३४५ स्टकको ५५,२७७ पटकको लेनदेनमार्फत ४ अर्ब १० करोड ५४ लाख रुपैयाँ बराबरको ९२ लाख ५५ हजार कित्ता शेयर किनबेच भएको छ।

बजारमा पाँच कम्पनीको शेयर सकारात्मक सर्किट लेभल मा पुगे। सागर डिस्टिलरी, माबिलुङ एनर्जी, बुङ्गल हाइड्रो, झापा एनर्जी र बन्दीपुर केबलकार एण्ड टुरिजम ती कम्पनी हुन्। साथै हिमस्टार उर्जाको शेयर ९%, र मिड सोलु हाइड्रोपावरको ७% भन्दा बढी वृद्धि देखियो। घट्ने स्टकहरूको गिरावट भने ४% भन्दा कम रह्यो।

कारोबार रकमका आधारमा साहस उर्जा अग्रस्थानमा रह्यो, कम्पनीले २२ करोड ९१ लाख रुपैयाँ बराबरको कारोबार गर्यो। बरुण हाइड्रोपावरको कारोबार १५ करोड नाघ्यो भने माउन्टेन एनर्जीको कारोबार १३ करोड रुपैयाँ भन्दा धेरै रह्यो।

यस दिन १३ वटै उपसमूह हरियालीमा रहे। होटल तथा पर्यटन उपसमूह १.२८% ले उकालो लाग्दै सबैभन्दा बढी बढ्यो। विकास बैंक र लगानी उपसमूहहरू पनि १% भन्दा बढी वृद्धि दर्ज गर्न सफल भए।