शेयर बजारमा निरन्तर गिरावट, लगानीकर्ताको मनोबल कमजोर

काठमाडौं । नेपाली शेयर बजार पछिल्ला साताहरूमा क्रमशः लगातार घट्दो क्रममा छ । बजारमा देखिएको निरन्तरको गिरावटले लगानीकर्ताहरूको आत्मविश्वासमा ठुलो कमी आएको छ । यद्यपि कम्पनीहरूले लाभांश वितरण घोषणा गरिरहेका छन् भने बैंकको ब्याजदर पनि निरन्तर घट्दै गएको छ र तरलता प्रयाप्त छ । तर पनि बजारमा त्यसको कुनै ठोस प्रभाव देखिएको छैन। हाल सूचीकृत कम्पनीहरूले चालु आर्थिक वर्षको पहिलो त्रैमासको वित्तीय विवरण सार्वजनिक गर्दैछन्। धेरै कम्पनीहरूको वित्तीय अवस्था सुधारिएको र लाभांश वितरण आकर्षक देखिए पनि लगानीकर्ताको चासो घटेको छ।

मंगलबारमात्रै साहस उर्जा कम्पनीले लाभांश घोषणा गरे पनि बजारमा त्यसको प्रतिक्रिया देखिएन। यस्तै अन्य कम्पनीहरूले ल्याएका सकारात्मक सूचनाले समेत बजारमा उत्साह जगाउन सकेको छैन। बजारमा देखिएको गिरावटका कारण लगानीकर्ताहरू राजनीतिक अस्थिरता र भविष्यको अनिश्चितताबाट भयभीत भएका छन्। विश्लेषकहरूको भनाइमा, बजार घट्नुका पछाडि मनोवैज्ञानिक कारणले पनि ठूलो भूमिका खेलेको छ।

बजार सुधार नहुँदा मनोवैज्ञानिक असर

शेयर बजारका विश्लेषकका अनुसार अहिलेको बजार अवस्थाले अघिल्ला वर्षको तुलनामा बढी चुनौती देखाएको छ । बैंकको ब्याजदर घटिसकेको छ, तर बजारमा भएको पैसा परिचालित हुन सकेको छैन। नेपाल राष्ट्र बैंकले दैनिक रुपमा तरलता सोसिरहेको छ, जसले गर्दा लगानीको वातावरण कमजोर भएको छ ।

राजनीतिक अनिश्चितता र लगानी संकट

लगानीकर्ताको प्रमुख चिन्ता भनेको राजनीतिक स्थायित्व हो। आगामी फागुन महिनामा तोकिएको निर्वाचन समयमै हुने वा नहुने भन्ने अनिश्चितताले बजारमा नकारात्मक वातावरण सिर्जना गरेको छ। यदि निर्वाचन सरेमा वा अस्थिरता अझै बढेमा यसको प्रत्यक्ष असर शेयर बजारमा पर्ने सम्भावना बलियो देखिन्छ। बजारमा विश्वासको संकट गहिरिँदै जाँदा दीर्घकालीन लगानी घट्दै गएको छ। कम्पनीहरूका नाफा र लाभांश घोषणाले पनि बजारमा नयाँ ऊर्जा ल्याउन सकेका छैनन्।

दोहोरो अंकको गिरावट

साता कारोबारको चौथो दिन, बुधबार, शेयर बजार फेरि दोहोरो अंकले घटेको छ। नेप्से परिसूचक २०.५६ अंकले घटेर २५४४ बिन्दुमा झरेको छ। यसले बजारमा पुनः दबाब सिर्जना गरेको छ। तर, सबै क्षेत्र नकारात्मक छैनन्। बुधबार केही नयाँ सूचीकृत कम्पनीहरूको शेयरमूल्यमा सकारात्मक सर्किट लागेको छ। भूगोल इनर्जी, भूगोल हाइड्रो, सागर डिस्टिलरी, र बन्दीपुर केवलकार कम्पनीहरूमा शेयर मूल्यमा सकारात्मक वृद्धि देखिएको छ। त्यस्तै, अप्पर सोलु हाइड्रो, नेपाल माइक्रो इन्स्योरेन्स, स्वस्तिक लघुवित्त, सर्वोत्तम सिमेन्ट लगायतका कम्पनीहरूको शेयरमूल्य पनि केही प्रतिशतले बढेको छ।

बजार स्थिरताका लागि नीतिगत पहल आवश्यक

अर्थविद्हरूका अनुसार, बजारमा देखिएको अस्थिरता समाधानका लागि सरकार र नियामक निकायले ठोस कदम चाल्न आवश्यक छ। सरकारले लगानीको वातावरण सुधार गर्न नीति स्पष्ट पार्नुपर्ने र राष्ट्र बैंकले तरलता परिचालनमा लचकता देखाउनुपर्ने सुझाव दिइएको छ।

दीर्घकालीन दृष्टिकोण आवश्यक

हालको बजार अवस्थालाई हेर्दा नेपालमा विश्वासको संकट नै प्रमुख चुनौती बनेको देखिन्छ। बजार घट्नु असामान्य होइन, तर लगातारको गिरावटले लगानीकर्ताको मनोबल कमजोर पारेको छ। बजारमा अहिले डर र अन्योलता हावी छ। तर, दीर्घकालमा राजनीतिक स्थायित्व, आर्थिक सुधार र लगानीकर्ताको विश्वास फर्किएपछि नेपाली शेयर बजार पुनः सुदृढ हुने अपेक्षा गरिएको छ।