एनआरएन इन्फ्रान्स्ट्रक्चरको बम्पर उपहारः ४२ प्रतिशत लाभांश र शतप्रतिशत हकप्रद शेयर घोषणा

काठमाडौं । एनआरएन इन्फ्रास्ट्रक्चर एण्ड डेभलपमेन्ट लिमिटेडले आफ्ना शेयरधनीहरूलाई ४० प्रतिशत बोनस शेयर र २.१०५ प्रतिशत नगद लाभांश (कर प्रयोजनका लागि) वितरण गर्ने घोषणा गरेको छ।

कम्पनीको कात्तिक २५ गते बसेको सञ्चालक समितिको बैठकले लाभांश प्रस्तावसँगै आगामी साधारणसभा आह्वान गर्ने निर्णय गरेको हो। बैठकले बोनस शेयर वितरणपछि कायम हुने चुक्ता पूँजीको १०० प्रतिशत (१ बराबर १) को दरले हकप्रद शेयर (Right Share) जारी गर्ने पनि निर्णय गरेको छ।

साधारणसभा विवरण

कम्पनीले आउँदो पुस ४ गते (शुक्रबार) बिहान ९ बजे काठमाडौंको थिरबम सडकस्थित आप्रपाली ब्यान्क्वेटमा तेह्रौं वार्षिक साधारणसभा बसाल्ने घोषणा गरेको छ। बैठकले वार्षिक प्रतिवेदन, लेखापरीक्षण प्रतिवेदन, लाभांश वितरण, हकप्रद शेयर निष्कासन तथा आगामी आर्थिक वर्षका लागि लेखापरीक्षक नियुक्तिसहितका प्रस्तावहरू साधारणसभाबाट पारित गराउने तयारी गरेको जनाएको छ।

एनआरएन इन्फ्रास्ट्रक्चरले हालसम्म विभिन्न ऊर्जा र पूर्वाधार परियोजनामा लगानी गर्दै आएको छ र यस वर्षको लाभांश निर्णय कम्पनीको पूँजी सुदृढीकरणतर्फको कदमका रूपमा हेरिएको छ।