पुँजी बजार देशको समृद्धिको आधार हो : चुडामणि चापागाईं

काठमाडौं । नेपाल स्टक एक्सचेन्ज (नेप्से) का प्रमुख कार्यकारी अधिकृत चुडामणि चापागाईंले शेयर बजार सञ्चालनका लागि नियम र स्वतन्त्रता दुवै सन्तुलित रूपमा आवश्यक रहेको बताएका छन्। नेपाल शेयर बजार लगानीकर्ता संघको प्रथम वार्षिक साधारण सभालाई बिहीबार सम्बोधन गर्दै उनले भने, “शेयर बजारमा नियम धेरै भयो भने बजारको उत्साह घट्छ, तर स्वतन्त्रता धेरै भयो भने अराजकता आउँछ।”

चापागाईंले बुद्धिमानीपूर्वक नियमन अपनाउनुपर्ने आवश्यकता औंल्याउँदै लगानीकर्ताको हित र बजारको ऊर्जा दुवै कायम राख्ने गरी नेप्सेले आफ्नो काम अघि बढाउने प्रतिबद्धता व्यक्त गरे। उनका अनुसार, पुँजी बजार केवल शेयर किनबेचको थलो मात्र नभई देशको आर्थिक समृद्धिको आधार हो। उनले भने, “राष्ट्रको विकास, श्रम, रोजगारी, उद्योग र लगानी यी सबै कुरा पुँजी बजारसँग जोडिएका छन्।”

सीईओ चापागाईंले हाल बजारमा नयाँ लगानीकर्ताको प्रवेश बढ्दो क्रममा रहेको बताए। तर, सेयर बजारसम्बन्धी साक्षरताको अभाव देखिएको भन्दै उनले लगानीकर्ता संघलाई साक्षरताको नेतृत्व लिन सुझाव दिए।

कार्यक्रममा शेयर बजार लगानीकर्ता संघका अध्यक्ष डा. केशव श्रेष्ठले नेपालमा लगानीकर्ताहरू संगठित हुन जरुरी रहेको बताउँदै संघ स्थापना त्यही उद्देश्यले गरिएको स्पष्ट पारे। उनले भने, “संघले लगानीकर्ताको आवाजलाई नीतिगत तहसम्म पुर्‍याउन महत्वपूर्ण भूमिका खेल्नेछ।”

त्यसैगरी, साधारण लगानीकर्ता संघका अध्यक्ष रितुजंग जिसीले राज्यले लगानीकर्ताको हितका लागि पर्याप्त सहयोग नगरेको आरोप लगाए। उनले भने, “संसारभर सेयर बजारको कारोबार राज्यको राम्रो प्लेटफर्ममा चलिरहेको छ, तर नेपालमा हामी संघ–संगठन बनाएर हिँड्न बाध्य भएका छौं।” उनले नियामक निकायले लगानीकर्ताका एजेन्डा बेवास्ता गर्ने गरेको पनि गुनासो गरे।