सेबोनले अर्थ मन्त्रालयलाई पठायो ३ बुँदे सिफारिस, कर्मचारी आन्दोलनको समाधानतर्फ पहल

काठमाडौं । नेपाल धितोपत्र बोर्ड (सेबोन)ले आन्दोलनरत कर्मचारीका माग सम्बोधन गर्न अर्थ मन्त्रालयलाई ३ बुँदे औपचारिक सिफारिस गरेको छ। बोर्डको सञ्चालक समिति बैठकको निर्णयअनुसार सो सिफारिस अर्थ मन्त्रालयमा पठाइएको हो।

सिफारिसको पहिलो बुँदामा मन्त्रालयले गत भदौ २ गते बोर्डका कर्मचारीको सेवा–सुविधा कटौती गर्ने र फिर्ता गर्न निर्देशन दिएको निर्णय पुनरावलोकन गर्न आग्रह गरिएको छ। दोस्रो बुँदामा कर्मचारीसम्बन्धी कार्यविधि खारेज गरी त्यसमा रहेका प्रावधानलाई संशोधनमार्फत नियमावलीमा समायोजन गर्न सुझाव छ।

तेस्रो बुँदामा धितोपत्र बोर्डको स्वायत्तता सुनिश्चित गर्न वर्तमान कानुनी संरचना परिमार्जन गर्न आवश्यक रहेको उल्लेख गरिएको छ। बोर्डका अनुसार स्वायत्तता कमजोर हुँदा संस्थागत कार्यसम्पादनमा प्रत्यक्ष असर परेको छ।

अर्थ मन्त्रालयको निर्देशनपछि सेबोनका कर्मचारी भदौ ७ गतेदेखि काम ठप्प पारेर आन्दोलनमा उत्रिएका थिए। मन्त्रालयसँग माग सम्बोधन गर्ने सहमति भएपछि उनीहरू नियमित काममा फर्किएका भए पनि कात्तिक मसान्तसम्म माग पूरा गर्ने भनी तोकिएको समयसीमा गुज्रिए पनि अहिलेसम्म कार्यान्वयन नभएको कर्मचारीको गुनासो छ।

हाल नियमित काम चलिरहेको भए पनि कर्मचारीहरूले प्रत्येक दिन एक घण्टा कार्यालय परिसरमै धर्ना जारी राखेका छन्। कर्मचारीले बोर्डको स्वायत्तता, सेवा–सुविधा र कार्यविधि संशोधनसम्बन्धी माग पूरा गर्न सरकारलाई ध्यानाकर्षण गराउँदै आएका छन्।