सेयर बजारमा उतारचढाव : ८ अंकले घट्यो

काठमाडौं । गएको साता ९६.५३ अंकले वृद्धि भएको सेयर बजार यो साता पनि उचाइतर्फ लाग्ने संकेत देखिए पनि सोमबार पुनः ओरालो लागेको छ।

आइतबार ३०.७५ अंकले बढ्दै २६३१.१४ बिन्दुमा पुगेको बजार सोमबार ८.२३ अंकले घटेर २६२२.९० बिन्दुमा झरेको नेपाल स्टक एक्सचेन्ज (नेप्से) ले जनाएको छ। सोमबारको कारोबारमा ७२ कम्पनीको सेयर मूल्यमात्र बढ्दा बजारमा ६ अर्ब ५ करोड २२ लाख रुपैयाँ बराबरको कारोबार भएको हो।

गत साता आइतबार बजार ५.१९ अंकले बढेको थियो भने मंगलबार ६२.२९ अंकले उकालो लागेको थियो। बुधबार ५.१७ अंकले घटे पनि बिहीबार ३४.२२ अंकले वृद्धि भई बजार २६००.३८ बिन्दुमा पुगेको थियो।

विश्लेषकहरूका अनुसार आउँदो चुनावसम्म बजारले क्रमशः गति लिने अपेक्षा गरिएको छ। सरकारले निजी क्षेत्रमैत्री नीति अपनाइरहेको र पूँजी बजारमा ध्यान दिइरहेको भए पनि लगानीकर्ता अहिले पनि ‘पर्ख र हेर’को अवस्थामा छन्।

गएको साउनयता देखिएको बजारको अस्थिरताबीच हाल बढ्दो ट्रेन्ड पुनः देखिन थालेको छ। लगानीकर्ताहरू अझै पनि २०७८ भदौ २ गतेको ३१९९.०३ अंकको रेकर्ड पार गर्ने प्रतीक्षामा छन्। त्यसयता बजारले साउन ३१ गते ३०००.८१ र गत साउन १३ गते ३००२.०८ बिन्दु छोए पनि स्थिर उचाइ कायम राख्न सकेको छैन।